КIан жеда гьикI хъфиз хайи СтIуриз,
Майдин вацра, кьуд пад къацу хьайила,
ЦIрадайла живер, вацIуз авахьиз,
ТIебиатди цуьквериз чан гайила.
ЦIигел я зун хуьруьн къайи булахдихъ,
КIаник галай машгьур кимихъ жегьилрин,
Наз гузавай чи таватрин бухахдихъ,
Акунривди дерт чукIурдай сефилрин.
Ван алатна фирла лапаг яйлахдиз,
РикIел къвечни чун ацукьдай чIереяр?
Къацу чIурал,миже кIватдай чIижер хьиз,
Къугъваз-къугъваз келер хуьдай береяр...
Хъфиз кIанда айвандилай килигиз,
Шагьдин суван живер алай кIукIушриз.
Хтанват1а чубарукар илигиз,
Гатфариз хас миливал гъиз рикIериз?