Шумуд югъ я дидедин вил рекьелла,
Яргъаравай гада хтун вилив хуьз.
Начагъвили ам кьунава- меселла,
Яд гатIана къуразавай булах хьиз.
Мукьва-кьили кIватI хьанава къе ина,
Къалабулух гала кIвалин гьавадихъ.
Ава амма диде тек са дердина,
Гъарик1 я ам вичин азиз баладихъ.
«Якъин авач хабар хциз гьалдикай!»-
Адаз туьнбуьгь кьабулзавач дидеди.
Фагьум тийиз чанда авай тIалдикай,
Хцин далу чилив гузвач дидеди.
Белки рекьер кIеви хьана, физ азаб,
Завай куьмек лазим ятIа баладиз?
Белки ама машин хана ам, яраб,
Тади галаз рикI хурудай акъатиз?
Легьзеярни залан я къе йисар хьиз,
Алахънава саки са кас ч1авар къаз.
Акъвазна рик1... диде физва, ахвар хьиз,
Дуьнядилай баладихъ вил галамаз.
… Пуд вацралай хва хтанвай и хуьруьз,
Акъвазнавай къариб суруз килигиз,
Чан аламаз къадир тахьай дидедиз
Гьазур хьанвай къизил гуьмбет эцигиз…