ЛЕЗГИ ГИМН
Зи лезги ватан, зи лезги чилер,
Кьакьан дагъларал элкъвезвай лекьер.
Хуррам лезги эл, ц1аяр алпандин,
Иесияр тир абад ватандин.
Дербен, Арас вац1, Къав-дагъ, Касрин гьуьл,
Девлетлу чилер, хкаждай гуьгьуьл,
Азад тир диде ватан хьана чахъ,
Баркаллу диге Алпан хьана чахъ.
Мидяйрин вилик алпандин эллер,
Хьана мерд лекьер, ц1аярин хьелер.
Хвена чи курар, хвена чи варар,
Ягъийрин хура лигимна турар…
Агат, алпанар, гъилин са туп1ар,
Даим хци хьуй бубайрин турар!
Ч1ал хуьх, лезгияр, кьуьл хуьх лекьерин,
Зуьрнени далдам мехъер-мелерин!
Рухваяр, рушар – гьар са хазанда,
Шарвилидин къаст авайбур чанда.
Зи лезги ватан, зи лезги чилер,
Кьакьан дагъларал элкъвезвай лекьер.
Хуррам лезги эл, ц1аяр алпандин,
Иесияр хьухь абад ватандин!