Дуьз са йис я, ингье заз вун такуна,
Эгейдин гьуьл, гьикьван я руьгь вахъ дарих!
Эхь, гила зун мад гъавурда акьуна:
Ви яхайра чуьнуьх хьанва зи тарих…
ТахьайтIа лагь, вучиз я заз вун кIани,
Лап чи Шагьдин рехивал квай кукIвар хьиз?
Япарава, йис акъатна, ви мани,
Мили я вун заз, лекьерин мукар хьиз?
Лугьузавай, уьцIуьбур я ви ятар,
Бес заз вучиз шербетдилай ширин я?
Вун рикIеваз саф жезава ниятар,
Гатун юкъуз тек ви патав серин я!
Тух жедач хьи ви лепейрин ванцикай,
РапI-рапIзавай, вацран эквер акьурла,
Заз хъуьцуьган хьана кьерен къванцикай -
Ксуз женни ви иервал акурла?
Эхь, залан я амма вавай къакъатун,
Руьгь инамаз, хъфизва зун ватандиз,
Мад кIанда хьи, багъридив хьиз агатун-
Хкведа зун пелазгийрин макандиз!