Къе жив ацукьнава шегьердин чилел,
ХъуьтIуьк дарихбурун сувар я саки,
Акурла кIвалерни, жив алаз кьилел,
Къе мадни зи рикIел хуьр хтана хьи…
Эхь, рикIел хтана хуьревай чIавар,
Экуьнин кьилелай живедал гелер…
Таватри храдай сумагдин навар,
ХъуьтIуьн йиф акъатна ийидай мелер.
Зи рикIел хтана хайи манияр,
Рушари лугьудай санал кватI хьана,
Жибинар ацIана - къуру инияр,
Акъвазун живедал алафар кана.
Зи рикIел хтана жегьилвилин ким,
Са вил булахдаллаз ракъурай вахтар…
Эй руьгь, ви гъавурда гьим акьурай, гьим,
Йисар къвез алудай, ракъуриз бахтар?!
Зи рикIел хтана кIани тир тамар,
Лацу либас алай ксанвай уьруьш,
Ашкъиди чаз гъайи сифтегьан гъамар.
Сифтегьан байихар, сифтегьан гуьруьш.
…Эхь, шегьер ксанва, лап хъутIьун сев хьиз,
Секин я, гьич са кас алач мукьварал,
Илгьамди мажбурна - ацукьна кхьиз,
Хиялар фенва зи Шагьдин кукIварал…