Хажалат...

             
      (Гъурбатда начагъ веледдиз чара ийизвай бубадин мецелай...)

Шегьре рекьер зун паталди дар я, диде,
Дараматар зи вилера сар я, диде…

Са вил хъуьрез,са вил шехьиз амазма зун,
Баладин дерт пара я кьван - чан я, диде…
Хкатдани бед хабарди кутур зурзун?!
Хажалатди къуркъурна рикI, къван я, диде.

Бес итимар  шехьдайди туш, лугьудатIа,
Акурла зи вилин накъвар, вуна, диде?
«Начагъвилиз яраб дарман жагъидатIа?»-
Кьилевайди тек хиял я кьуна, диде…

Йифни югъни сад хьанава, амач кьарай,-
Лезет кумач дуьнядикай гьич заз, диде.
Эхиз жезмач, кIанда рикIиз ийин гьарай,
Ван къведайвал гьам аршиниз, гьам ваз, диде!

Шегьре рекьер зун паталди дар я, диде.
Дараматар зи вилера сар я, диде…