Гьар гьиниз зун фейитIани,
Гьар гьина зун хьайитIани,
Карагзава вун виликай,
Хкатзавай хьиз чиликай…
Кан жеда заз къан гъиликай,
Ялин жувахъ кIевиз–кIевиз,
Магнитди ракь чIугвадай хьиз…
Амма катна са легьзеда,
Хъуьрез къвазда са жуьреда…
Чинебадик заз килигиз,
КичIе хьанвай жейранди хьиз…
Зи уьмуьрда эквер канa,
Къакъатзава хиял хьана…
Им вуч жаза, им вуч азаб?
Эхиз жезмач завай мад икI!
КьатIузвач жал вуна яраб,
Вахъ цIигел хьун, акъатиз рикI?
Ингье, чидач, лугьун за гьикI:
Ша, зи патав агата вун,
Ша, зи чандик аката вун,
Акъвазарна залум къугъун,
Ша, зи руьгьдин гьаким хьухь вун!