Чун паталди туш и шегьер,
ЭхнатIани мад са тегьер…
Вун - къизил зар, зун - ви заргар,-
Ша, акъатин Селибурдал.
Хъуьрезва дагъ, хъуьрезва рагъ,
Лап ви жуьре, гьа ви саягъ!
ТуькIуьруьн са ашкъидин багъ
Ша, акъатин Селибурдал.
Элкъведайла лекь рагарал,
Хвешидаказ гьикI ракъарал,
Цуьквер храз ви чIарарал
Ша, акъатин Селибурдал.
Гайи чIавуз экуьнин лаз,
Экъвен чIурал мили гел таз,
Бахтавар жен зун вахъ галаз,
Ша, акъатин Селибурдал…