Лайих туш вун, зи ашкъидиз лайих туш,
Гьуьл кьван дерин, дагъ кьван кьакьан, байихриз.
Къарих туш вун, пак гьиссерихъ къарих туш,
Чуьлда сефил, цик къекъвезвай гъариб хьиз.
Чириз хьанач завай ваз ашкъ вуч ятIа,-
Ярдин рекье азаб чугун, дерт чугун.
КIанивиле заз са дуьня аватIа,
Ви алемда муьгьуьббат вич - са къугъун…
Вахце вуна а гьиссерин деринвал,
Акъатна вач, бахтар хьурай ви кьисмет,
Эгь..., амукьрай зи ругьда и серинвал,
Са масада гурай гила ви къимет…