Накъваривди ацIудачни вилер бес,
Чин чиналлаз са салам кьван тагайла?
Хайибур хьиз, галатдачни гъилер бес,
Ялав галай рикIе са къван гьатайла?
Жедачни бес пеле бириш какахьна,
Вун масадан патав нагагь акурла?
КIанивилин карвандин рехъ акахьна…
Тал къведачни кьил бес цла акьурла?
Нуш жедани гуьлуьшандин яйлах бес,
Рагъ хъфена мичIи цифер атайла?
Кьурадачни зи ильгьамдин булах бес,
Кьисметди икI, залумди хьиз, гатайла?