Яйлахдава, зун кьакьандал ацукьна.
Дагъдин кукIвар хкатнава, хилер хьиз,
ЧIур хъуьрезва, къацу либас алукIна,
Тахтунавай сусан мили вилер хьиз.
КIанивилив чIиж цуькверал фейила,
Тади галаз шербет тухуз хизандиз,
Чубарукдин манидин ван хьайила,
Къвезава са нагагь ашкъи зи чандиз…
Хпен суьруь ава Гавдан дереда,
Яргъарилай аквазва хьи, цIарар хьиз.
Са чIавалай жеда лапаг береда,
Некедин сел авахьда гьикI, вацIар хьиз.
Саларава зегьмет кIани инсанар,
Дамахар тир зи шиирдин цIарарин.
Къуй сагъ хьурай рам ийидай куь чанар,
Азгъунвилер гьар девирдин гарарин!
Кизирдин яд ргаз физва авахьиз,
Какахьзава дагъдин вацIухъ чаз масан,
Хур ацIузва хуш байихрив алахьиз-
Тесниф ая, лугьуз, хайи чи ватан!