Ша хъфин, дуст, чун дуьз пелел Навчадин,
Гьава къачун Шагьдин суван кьилелай,
Аквадайвал иервал и хончадин,
Михьидаказ, къачудай хьиз гъилелай.
ЭвичIин чун Рушар къугъвай хивелай
Гуьне патахъ, чIурун винел кIарариз;
Хайи чилин кукIушрилай жив алай,
ТIем атурай шииратдин цIарариз.
Ингье Арчан, берекатдив бул макан-
Ниси, гъери, шур кIандани ваз хъсан?
Фена Кьерел са тIимил кьван ял ягъан,
Агатин чун тIебиатдив чаз масан.
Нупадава ЧIафун хичи хупI серин,
Экуьн кьиляй са кеф тушни жен ана?
Байихдайвал атир тир дад цуькверин,
ЦIигел тушни чигедихъ бес, лагь вуна?
КьатIузвани зи рикI ятIа гьикI дарих,
Хайи чилихъ, ашкъи галай Шанидин?
Айиб авач, хьайитIани чун къарих,
Акьван яргъал туш хьи булах Жанидин.
Жеда якъин Селибурдал чи кьакьан,
А вахтунда хпен суьруь береда.
КъведтIа яраб чаз рушарин верци ван,
Амач жал бес сурар Гавдан дереда?
ЦIулахъ, Илихъ, Яргъи кекни, Яр гуьне,
ХупI ярашугъ аквазва квез Качал кIукI!
Эхь, куь тIварар гьар са чIавуз къаз вине,
Машгьурда за манийра тваз Илин рук.
ЧIухвардин тул, Эсмеран кунтI бес туна,
Тади женни расалдиз физ Лакырдив?
Вуч хъсан тир, жув кьван авай лаш кьуна,
Хьайи чIавар и яйлахра нехирдив!
Кьалхандилай Деркелдал кьван эвел хьиз
КъугъвазматIа къуьрер чаз чид камара?
Ша, мугьман жен Къутургъандиз, ТIакариз,
Ашкъид иви ргаз хьурай дамарра.
Пагь, вуч кIан я, яд хъван Кизир булахдай,
Яваш-яваш, лезетдив пIуз эцигиз,
Акъахдани ахпа Сувал яйлахдай,
Къежел, Шимер, Суьчей патаз килигиз.
Нисинилай хквен чIехи СтIуриз,
Сепилрикай Мегьер патал алукьна.
Рагъ алцифна хъфидайла Хинариз,
Жедайвал чун хуьруьн Кимел ацIукьна…
Дустар чна вири санал агудин,
Акурбуруз къведайвал лап пехилвал!
Ихтилатрив верцидик йиф акъудин,
РикIел хкиз аял чIавар, жегьилвал…