ПцэшIо онтэгъоу уашъор убгъугъэ,
Ощхыр тещхагъэу чIыр ушIунцIыгъэ.
Гупшысэхэр къакIо, къэсы ащ ягъо:
Тызэрысэу хэгъэгум ит гукIодыгъо.
Сэплъэ сэлъэгъу ит гузэжъуапIэ,
КIэлэхъоу сабыим янэ къин чIапIэ.
Ыпшъэ ишIагъэу тхьапэм тетхагъ:
ШъукъыздеI мардж,- сисабый хьэзабым хэфагъ!
Узым ар ешхы ыл хэтIысхьагъэу,
Псэхэхыр къежэ, ыдыжьы къэкIуагъэу;
IэкIыб къэралым ар сщэщт щыхъужьыщт,
Ахъщабэу ищыкIагъэр, къысэшъут- сыугъоищт.
ЫнэкIу укIаплъэмэ ыгу илъыр итхагъ,
Ащ кIэслъэгъуагъэр сыдэу мытхъагъу:
ШъукъыздеI мардж!- ынэхэр къаджэ,
ИгумэкI гум хэсагъэу, къамэу щэуджы.
Сыд сэ пфэсшIэна ны гузэжъуагъ,
Сиахъщэ такъыры сыдыр ишIуагъ.
ХэкIыпIэ яIэп, ным ари ешIэ,
Псэхэхыр, кIалэм ылъапэ къыщешIэ.
Къэрал зещакIомэ таущтэу ясIона,
Сабыеу гузажъорэм сыд еспэсына?
Iум игъолъхьагъэу Iор къысшIудэкIы:
Къэрал зещакIохэр, укIытэ къэжъугъот,
Сабыйхэр хъужьынэу, ахъщэ ащ къяшъут!
ПцэшIо онтэгъоу уашъор убгъугъэ,
Ощхыр тещхагъэу чIыр ушIунцIыгъэ.
Гупшысэхэр къакIо, къэсы ащ ягъо:
Тызэрысэу хэгъэгум ит гукIодыгъо.