КьецIил хьана сефил я рук,
Кефи авач - пелеш я рагъ,
ГьинаватIа зи чубарук?
Ацукьнава ч1ередал чIагъ.
Хквезамач къушарин ван,
Зун ахварай авудзавай,
А манияр - зи эрзиман,-
Руьгьдик шадвал акудзавай.
Агатзава хъуьтIуьн къаяр,
Йигин-йигин вегьиз камар.
РикIел хквез Яран паяр,
Гьатзава зи чанда гъамар…
Къвазва марфар, къвезва гарар,
Кьуд пад кьуна - мичIи цифер,
Ингье квахьна мад зи къарар,-
ГьикI акъудин яргъи йифер?
ЧIулав акваз экуьнлай цав,
Акатзава зи чандик фул,
АлатIани къизилдин нав,
КIандач хьи заз, кIандач хьи зул…