Гатфарин нур-экв хьиз акур вилериз,
Билбил я вун мани лугьуз цуьквериз,
Бубуйрин ранг чкlай мили хъуьхъвериз,
Зи илгьамдин нурар я хьи, вун Мекке?!
Лацу чинал къизилгуьлдин зар алай,
Вучиз ваз вав кьан тийидай тlвар ганай?
Мус акуртlан чина ви хъвер, рагъ авай
Зи шадвилин сувар яни вун, Мекке?!
Дуьнья чlулав я вун патаг алачиз,
Иштягь къвезвач суфрадихъ вун галачиз,
Рикl вуч дар я, вун хуьре къе авачиз,
Зи кьисметдин лувар яни вун, Мекке?!
Акурла зун нур чlкизва кьве вилелай,
Мили тир хъвер алат тийиз сивелай,
Вуч хуш я заз гафар вин мецелай,
Камалдинан гьунар я хьи, вун Мекке?!