Акун паталди и дуьнья гуьрчег,
Агь ви чина зи вилер кIандай, яр!
Ахпа лугьудай: «Я кьван вун керчек,
Вун къужах кьадай гъилер кIандай, яр!»
Вили тир цавуз тамаш хъсандиз,
А виливилихъ а кьил авач, яр!
Бахтни гуда кьван ашукь инсандиз,
Зи кIанивилиз а кьил авач, яр!
Цуьквериз тамаш яруни цIару,
Абуруз дуьнья кIандач атирсуз.
Заз кичIе я вун, къилихдиз чIуру,
Гьалт авуникай такIан, къадирсуз.
Агь ви хура зи рикI аваз кIандай!
Зун хьиз тахъвана, пиян жедайвал.
Цуькверал къайи чиг алаз кIандай,
Чими ракъинкай аян жедайвал!
Белки ви рикIел аламач а вахт –
Чун кьвед сад-садал ашукь тир чIаван.
Яраб вилериз ахквадатIа бахт?
Къафун галай хьиз фу жедай яван.
АкъатнаватIан чIехи яшариз,
Вун мад ахквадай вилер кIандай, яр!
Тамаш ийиз ви руьгьдин къашариз,
Къужахламишдай гъилер кIандай, яр!