Перизада, перизада, мехъер я,
Лагь манияр, лагь Магьире, к1евиз лагь!
Рушар-жейран, гадаярни лекьер я,
Лагь манияр, лагь Магьире, к1евиз лагь!
Чи чандавай ц1аярикай лагь вуна,
Винел къвезвай къаярикай лагь вуна,
Чи кьисметдин паярикай лагь вуна,
Лагь манияр, лагь Магьире, к1евиз лагь!
Чи таватри булахдал квар къадайвал,
Чи кьегьалри Марвардин яд хъвадайвал,
Лирлийрин нур рик1ин къенез къведайвал,
Лагь манияр, лагь Магьире, к1евиз лагь!
Ваз хьи ава икьван мили ван, аваз,
Ашукь я вал Къуба, Къусар, лап Хачмаз,
Яргъи Рушан ирид жуьре ранг галаз
Лагь манияр, лагь Магьире, к1евиз лагь!
Ви ванцикай к1анивилин нахишар
Авахьзава зи гуьгьуьлдиз перишан,
Ахъа жезва зи пелевай биришар,
Лагь манияр, лагь Магьире, к1евиз лагь!
Перизада, перизада, мехъер я,
Ви макьамар мич1и цава гъетер я,
Марвар я вун, зар чк1извай гевгьер я,
Лагь манияр, лагь Магьире, к1евиз лагь!