Сажидин дуст, накьни, къени, пакани,
ТукIун тийиз хьайитIа са шапIани,
Давам хьурай ви суварин компани,
Разивалда, валлагь, кесиб папани…
Бес жеда чаз кьве верг, кьве хъач – хъикьиф хьун,
Жагъун кIане мани лугьуз, са йиф хьун,
Гьич чир жедач чи мецизни зайиф хьун,
Ахвар ерли тавуртIани гьайиф хьун…
Чун чIаларин жеда уьткем къиратдал,
Юг гатада физ са-садан гьаятдал,
Тарифарда «НуькI халайрин» нубатдал,
Рази жедач гьеле са бир-бубатдал.
Къеле яда къажгъанризни къазанриз,
Цурун кварар хкиз цIийи мизанриз,
Чун аквада, кьарай квахьна, хизанриз,
Ухшамиш яз сур вахтарин мазанриз!
Чибур – чIалар! Емишар я, шит тежер,
Идаз-адаз пай авуна, кьит тежер.
Дергесар хьиз я, векь ягъиз, куьт тежер,
Хуьруьн нуькIвер, мад санихъни куьч тежер.
Гьахьтин илгьам, гьахьтин цавар ава чахъ.
Гьахьтин рувар, гьахьтин къавар ава чахъ.
СтIал буллах – чи бахтавар ава чахъ!
Къе юбилей – чIехи сувар ава чахъ!
Мерд Али