Мехъер я къе, ярар, дустар кIватI жедай,
Далдам-зуьрне ягъиз макьам, шад жедай.
Игитн Чамни гуьзел тир Свас сад жедай,
Ви гьунар я, шивдал алай, Чамарчи!
ТIарамдаказ ацукьна хьиз пурара,
Вун устад я шад межлисрин крара.
ЦIай хьиз къугъваз, рикIер авай хурара,
Гьар межлисда дустар галай, Чамарчи!
Свас хуькведай чIавуз Чамран кIвалихъди,
Шивдив камар зарб къачуз таз виликди,
Туьфенг гъиле аваз, туьнт тир къилихдин,
Муштулухдин хабар гудай, Чамарчи!
Чам сад ятIан, чамарчияр мад жеда,
Куьн шад акваз, хъуьтIуькайни гад жеда.
КIвенкIвечи хьун, гьар сад патал ад жеда,
Шадвилерал лап рикI алай, Чамарчи!
«ЦIийи Свас – Квез, Муштулухар чаз,-лугьуз,
Ша, ашар нез, ширин шуьрбет хъваз,-лугьуз,
Шад мехъерар мадни хьурай чаз!»-лугьуз,
Кьуьл авунал вилер алай, Чамарчи!
Къуьне туьфенг, вилер алай луьледал,
Туьфенгрин ван акьалдарда къеледал.
Мехъерин дем къурмиш ийиз мягьледал,
Чка кьада на ваз къулай, Чамарчи!