Вуч гуьзел я экуьнин вахт!
КIекери фад къарагъардай.
Рагъ экъечIиз акун я бахт,
Алем кIвачел къарагъардай.
Цуьквуьн атир къугъваз цава,
Гьикьван кьезил жеда гьава?
ЦIайлапанрихъ къуват ава,
Туп хъиткьир хьиз багърагъардай.
Акатда марф, хкякьда фад,
Чилер, цавар авуна яд.
Са кIанда заз гатфарни гад,
Галат тежез кIвалахардай.
ТIебиатдин куьлуь, ири,
Аказ-акваз жеда дири.
Ша, дустар, чи хуьруьз вири,
Манийрикай булахардай.
Кватайда хьиз ахварикай,
Суьгьбетардай махарикай,
Сажидин я, чIаларикай,
Вирт хукудиз, мумлахардай.