Чидачирни квез зи захавиликай?
Экьи чехир хукудна хьиз чиликай,
Мехъер межлис ийидай за кIваликай,
Им са вахтни хьанач къе куьн атайди!
Я нисинин вахт им шиш-кабабдин,
Дустар галаз са кар тир хъун сувабдин.
КичIе тир хва туш зун гудай жавабдин,
Им са вахтни хьанач къе куьн атайди!
КIвал ацIанвай виртIедивни гъеридив,
Са хинкIарни ийиз тадай къаридив.
Гьаятарни ацIанвай зи суьруьдив,
Им са вахтни хьанач къе куьн атайди!
Я няни туш, къулайдиз кеф чIугвадай,
Квез мукьувай зун вуж ятIа аквадай.
Дуьшуьшрикай Аллагьди хуьй таквадай,
Им са вахтни хьанач къе куьн атайди!
Зал вил алай акъвазна куьн сятина,
Хъифиз, рекье гьатзава фу туьтIуьна.
Жафа хьанай, акIанайтIа туьтуьна,
Им са вахтни хьанач къе куьн атайди!
Я гад хьанач, я гатфар, я зул хьанач,
Квез чай кьванни гуз, цIай авай къул хьанач.
Лугьуз тахьуй, захъ квез харждай пул хьанай,
Им са вахтни хьанач къе куьн атайди!
Гьич дуьз кIвалах хьанач хъифин гишила.
Паб рекьидай, и ван хьана, хвешила.
Медни авай, авунайтIа хашила,
Им са вахтни хьанач къе куьн атайди!
Мад къведайла, килигна хьиз сятиниз,
Я няниз ша, я тахьайтIа – нисиниз.
Ийидай за кIанивал куьн нефсиниз,
Им са вахтни хьанач къе куьн атайди!