Тэдрэ чылэ укъэкIыгъа,
Тэдрэ хэку ущапIугъ?
ЦIыфы бзаджэ ухэкIыгъа,
Таущтэу нэфым укъекIугъ?
Зафэм мафэм лъапэр дедзы,
ШIункIыр бзаджэмэ ямаф;
Ежь щымыщыр хым къызхедзы,
ХэкIокIэтэп, ащ фэшъхьаф.
КъакIо, къакIо тэ тихьакIэ,
Мэфищ охъуфэ удгъэшIон,
Ащ нэужым уикъэкIуакIи,
УигумэкIи къытэпIон.
КэпIотагъэмэ къэуцуи,
ЗэрэплъэкIэу къыддэлажь,
О лъэбгъуцоу умыуцуи,
Мыхъурэр зэкIэ тэ тилажь.
Ма тигъэжъуи, ма тимашIуи,
ТиосапкIэ - уизекIуакI,
Щизы мыхъумэ тэ ащ фэшIуи,
Кэдгъотыт о къытхэкIуакI.
Бгъэзэжьытмэ ар уиIофы,
Гъогоу тиIэхэр къэнэфы;
Шым тэ уанэр пфытетлъхьан,
О уиIофми ауж уихьан.