Куьлег дагълар, мублагь чуьллер,
Дагъдал къугъваз, элкъвез лекьер,
Квез тамашдай кlанда вилер,
Хайи ватан, зи Кашанхуьр.
Аратl багъдай къачуз бегьер,
Гьар са булах шуьрбет-шекер,
Цуькверивди дигай чуьллер,
Авадан хьуй ви, Кашанхуьр.
Абу-земзем къулад булах,
Гатун юкъуз кlанда къвалахъ,
Рекьидалди ийиз дамах,
Гьазур я зун вал, Кашанхуьр.
Гьалалдин фу вилик гъидай,
Мугьмандиз чин-рикl ачухдай,
Кьуьзуь чlехи гъвечlид чидай,
Гьуьрмет авай, зи Кашанхуьр.
Гьинай я вун кьурла хабар,
Кьада ашкъи кваз за ви тlвар.
Ягъиз гъилер гъиз эхтибар,
Зи хуьруьн тlвар, я "Кашанхуьр".
Хьайитlани зун яргъара,
Къекъвезва зи рикl дагълара,
Амма ава зи япара,
Хайи дидед ван, Кашанхуьр.
Шиир кхьиз хуьр рикlеваз,
Эвледар,яр-дуст рикlеллаз,
Камалдина лап вижеваз
Йизва тариф, зи Кашанхуьр!