(Рабият Бадедин экуь къаматдиз бахшзава)
Лай-лай ягъиз йифиз-юкъуз зи кьепlин кlане
Ахвар хана, гелкъведай вун захъ, азиз баде.
"Ксус, бала, ширин бала, вун я зи куьрпе",
Лугьуз, мани ягъиз, жедай вун чуплах кlвале.
Кашни мекьни эхна вуна четин вахтарин,
Зун кlулаллаз къайгъу чlугваз жедай къушарин.
Акунач ваз са югъ регьят къецин суварин,
Залан парар ялна вуна уьмуьрдин къене.
Буржлу яз зун уьмуьрлухда амукьдайд я ваз,
Гьалал ая вуна чlугур а зегьметар заз.
Мани вакай лугьуда за, хурал кьуна саз,
Нур къурай ви, чан зи баде, женнетдин кlвале!
"Билбил " ктабдай.