Уршили рурсилике,
ЦIакьле диги дихьилри,
Дигахъуй хIалугуле,
ЦIакьле бекIудийкилри.
Нам рихаягъа иле,
Га укIуле вашулри,
Га кьабулхIабариле,
ГIурра их чарурулри.
Рурси урхIис лугуле.
ЦIакьле гIядабле цайри,
Дигили их игуле,
Кудили хIял иргъайри?!
Рурси цунес арасес,
Хугил хIяракат бариб,
Рурсила дудеш нешли,
ГIурра их санвархIариб.
Рурси ихис дигахъуй,
ЦархIилис гесла бугьуб,
Рурсила тилади рукIуй
Гъай бикьан цалра хIавгьуб.
Рурсилис дигхIайгулис,
Неш дудешли гьубис гиб.
Цуния дигахъуйке,
ХIулбе цIакьле тIардукIиб.
Зулмуличу гибила,
Рурси цен руэсара?!
ХIял балули дигила,
Иххъуна баресара?!
Урши дахъолх халукIиб,
Усесра урхIавруле,
Хугил пикрилзе икиб,
Рурсира дигахъуле.
ДуцIарил дигилизе,
Уршила диъ-кам дигуб,
Хугина гIязаблизе,
Дахъол яхI барес хIавгьуб.
Дигахъуй урхIли руциб,
Уршира кьакьа вакIиб,
Бархбикес хIабатува,
Уршила уркIи пIякьбикиб.