Мал-девлет кан жемир,нефс хуьх жуван,
Пулари ийидач чIанади кIубан,
РикI михьи, ният саф, кесиб ятIани
Лап зурба хандилай винева чубан.
***
ЛукI тушни бес вичел кьве чин алайди,
ЧIагъ ятIани, къизил кукул галайди?
Агуд мийир жуван патав хаинар,
Абур авай уьмуьр жедач къулайди.
***
Вилиз таквадайди аквада рикIиз,
Гьакъикъат яракь я атIудай хциз,
ГалачтIа патав ви жуваз каниди,
Руьгьда къаяр жеда лап гатун цикIиз.
***
Гаф акъуда жуван сивяй чурана,
ТахьайтIа ви берекат жеч курана.
Гьахъ патахъна нагьахъвилин пад къамир,
РикIел хуьх гьа,жаваб гуда сура на!
***
Канивал вуч ятIа, чидани ваз, лагь,
Авачир са дарман начагъвал я, пагь!
Гагь щадвал, хурамвал, гагь накъвар гъида,-
Чун вири лукI адан, ам - гьиссерин шагь!
***
Алахъа хабар кьаз масдан тIалдикай,
Чарадан руьгьдавай къалмакъалдикай,
Вине кьаз жува жув,лавгъавал мийир,
ЧIав къведа,куьцIуьда,вун ви гьалдикай.
***
Ахъайин жегьилар, за сир квез гила,
Руьгьдиз къаяр къведа йисар фейила,
Ая крар даим, жегьил амукьдай,
Пашман тежедайвал кьуьзуь хьайила.