Азиз зи яр, де куьз ваз зун дакlанда?
Гьикьван дердер твада вуна зи чанда?
Вун такурла зун гьамиша пашманда,
Зи рик1из са шад хабар гъваш, кlани яр.
Куьз кикlида вун за са гаф лагьайла?
Вав явашдиз ширин мецел рахайла.
Катмир закай зун ви патав атайла
Легьзеда зи гьалдиз тамаш, кlани яр.
И дуьнья гьич са касдизни хьайид туш,
Вуна хьиз зи рик1 садани кайид туш,
Садазни за ви тlвар маса гайид туш
Квез герек я дяве - саваш, кlани яр ?
Кlан хьуналди цавай гъетер гъиз жедач
Вун такурла завай сабур хуьз жедач,
На зи гъил яхъ дердер мад чаз хъжедач.
Зун акурла къекъуьгъ яваш, кlани яр.
Дустарив вун рахада хупl шириндиз,
Эвичl ийиз гьар гафунин дериндиз
Амма, куьз вун рахада зав " сериндиз "?
Муьгьуьббатдин вун я са къаш, кlани яр.