Фана дуьнья

Сулейман Ахтынский
Фана дуьнья ви винел бахт,
Буш цифериз ухшар я хьи.
Гъилиз атай аквадач вахт,
Гьак1 вилерин къаншар я хьи.

Фана дуьнья, гана хуп1 яд,
Ивидин сел акъудна на.
Чи хъвер-шадвал я геж я фад,
Угъриди хьиз къакъудна на.

Фана дуьнья, гишин руфун,
Суфрадихъ ви тух жедай туш.
Са багъдани къекъвей чайгъун,
Бегьерар артух жедай туш.

Фана дуьнья, къизил -кепек,
Дидедлайни багьа я къе.
Къармах къуьруь, к1уф патах кек,
Лекьериз хан-буба я къе.

Фана дуьнья, къайи гуьлле,
Халкь галайвал ракъурмир на.
Шумуд ц1уьк1рай ивид гьуьле,
Мийитрив чил ац1урмир на.