АГАТДАМАЗ СА-САДАВ
Заз акI я хьи, шад жеда,
Хъверда вири гафари,
Гафар гьатда навара,
Лув ахъайна цавара
ЦIарцIар гуда, нур гуда,
Къалгъун жеда хтар хьиз,
Чигедин пак тварар хьиз,
Гафар гьатда цIиргъина,
Гафар гьатда шиирда,
Гафар жеда бахтавар,
Агатдамаз са-садав
КIватI хьайила шаирар.
Кьакьан, михьи кьатIунар,
Хару гьиссер авагъда,
ЧIехи муркар цIрада,
Дуьня гьатда нурара,
ВацIар жеда хуьлеркай,
Дагълар жеда пелеркай,
Цава гъетер хъуьреда,
Чилел- ттулар, дуьзенар.
Дуьз рахада дуьнядин
Вири терез-мизанар.
Вири дуьня, Каинат
Иер жеда, саф жеда,
Чилер цавув агатай
Гьахьтин дигай чIав жеда.
Экуь рекьер акатда,
РикIяй-рикIиз жигъирар,
Агатдамаз са-садав,
КIватI хьайила шаирар.