(На церковно-славянском языке)
МОЛИТВА
Якоже крепкия двери
ВнИти в дом татем смущают,
Якоже в мрачней пещере
СвЕтло свеща освещает,
Тако молитва, вошедши
В сердце, угль скорби утушит,
Мглу расточит и утешит
Смыслом скорбящую душу.
БОЖИЙ СУД
Егда поставятся на суд
Престоли Господа святии
И пред Его СудИщем тут
Преклонят человецы выи, –
Царь воина ли упредит? –
Не преимуществит владыка
Раба пред взором Судии,
Собравшаго на суд языки.
Тут кийждо бо от дел своих
ИлИ прославится в велицем
Господнем Сонме во святых
ИлИ, отвержен, постыдится.
* * *
Яко морская пучина
МнОга моих прегрешений,
Гибельно в ню погрузихся
Аз глубиною падений.
Спасе, даждь руку Свою мне,
Яко Петрови, благую.
Боже, спаси и помилуй,
Бездну грехов да миную.
* * *
Вси побдим, и Христа в нощь усрЯщим
Мы со множеством правды елеа
И со светлыми в рУцех свещами
Внутрь сподобимся быти чертога.
Иже бо вне дверей затворенных,
В неразумней постигнувый лени,
Воззовет ко Владыке бездельно:
Мя помилуй и двери отверзи.
* * *
Мати света Богородице,
Умоли, Благословенная,
Христа Бога Жизнодателя
Нам простити прегрешения,
Нас избавити от лютости,
И от всякаго злодействия,
От душевнаго смущения,
От уныния житейскаго;
Жития нам исправления,
Веры с малую горушицу, –
Песнословием, любовию
Присно чтущим Тя, Споручнице;
Утро днесь совозсияти всем
И подати милость велию,
И сподобити Небесная
Улучити нам веселия.
* * *
Во юдоле плачевне, на месте том,
Еже мира в конце завещал еси,
Егда сядеши, Праведный Господи,
Сотворити суд гнева и благости,
Тамо не обличи сокровенная
Вся моя, и нижЕ посрами мене
Что пред Ангелы благословенными,
Но спаси Твоего ради имени.
* * *
Ни иного прибежища вернаго,
Ни в бедАх утешения всем,
Ни святаго предстательства теплаго,
Тебе разве, Царице, не вем.
Яко паче имущи дерзание
Ко рожденному же из Тебе,
Помози, Воеводо возбранная,
Не остави мя в слезной мольбе.
* * *
Богородице Дево Нескверная,
Ты моли – Сына – с горними силами
Дати прежде конца нам прощение
Прегрешений и велию милость.
СТРАШНЫЙ СУД
…Тяжко на Страшном судищи решающем,
Кийждому бо по делом отмеряющем:
Без оглагольников обличаюся
И без свидетелей осуждаюся,
Книги бо совестныя разгибаются,
Дел сокровенных грехи открываются
И изливаются слезы горючия,
Свет застилается грозною тучею.
Но прежде неже во оном всесборищи,
Во всенародном велицем позорищи
Имаши вся испытати деяния,
Яже содеях злонравием ранее,
Боже, молю Тя, очисти мя грешнаго,
Спасе, избави от мрака кромешняго,
Тьма бо есть зрению узы несносныя,
Но, яко сына дне,
мя яви, Господи.
* * *
Дремля на ложе
согрешений многих,
Врагом борющим окрадаемь есмь верней
В надежди воскресения из мертвых,
В делах спасения души
от тьмы страстей.
Блудницы слезы,
Спасе, предлагаю,
Сон ибо лености и праздности души
Безчестием ходатайствует муку
В грядущей вечности,
взор мраком потушив.
Но Ты, рождейся
от Святыя Девы,
Воздвигни мя неосужденно к Твоему,
Владыко жизни, пению, со всяким
Хваля дыханием Твой Свет,
поправший тьму.
РОЖДЕСТВО
Дева днесь в нощИ раждает
Мир сотворшаго пресветлый
И земля вертеп укромный
Неприступному приносит;
Сонмы ангелов небесных
С пастырьми стад славословят;
От восток волсвИ же путь свой
Со звездою совершают;
Нас бо ради днесь родися
Младо Отроча, и в яслех –
На престоле херувимстем –
Спас могущий, Бог превечный.
* * *
Блудный, в беззакониих зачався аз
И взирати не дерзаю с трепетом
Мысленным на высоту Небесную,
На небес Светило лучезарное.
Но зову, на человеколюбие,
На Твое дерзая милосердие:
Господи, очисти мя, порочнаго,
И спаси по щедрой Своей благости.
Аще едва праведник спасается,
Где явлюся грешный и неправедный,
ПоказУя скверная деяния,
С ними любострастная стремления.
ТяготЫ и зноя полудневнаго
Аз не понесох по празднолюбию,
Но, Владыко, сопричти с наемники
Мя часА единонадесЯтаго.
* * *
Аз сый древо неплодное, Господи,
Сокрушений плода не ношу отнюд
И страшуся души посечения,
И боюся огня негасимаго.
Темже Тя молю, Бога Всевышняго:
Прежде оныя нужды помилуй мя,
Обрати и спаси от погибели
И от мук посреде сени смертныя.
* * *
Яко волны морския взыграшася,
Так воссташа моя беззакония,
Яко утл кораблец над пучиною,
Злом и скверною обуреваюся.
Но премудрый, прещедрый Спасителю,
Мя настави в покоя пристанище
Покаянием, даруй прощение
И спасение необоримое.
* * *
Судии Царю седящему,
Горним Ангелом стоящим,
И трубе гласящей рожаной,
Пламени, в аду горящу,
Сотвориши что, душе моя,
На судилище суровом,
Отвещати како будеши
Испытующему Слову?
Вся твоя тогда бо лютая
Беззакония предстанут,
Обличатся согрешения,
Бездна похотных желаний,
Помышления лукавая
И дела вся посрамятся
И обрящеши мучения
Ты, душе, в геенне адстей.
Темже прежде часА смертнаго
Возопий Царю Владыце:
Боже Праведный, помилуй мя,
Яко падшую блудницу.
* * *
Почто убогаго обидеши,
УдЕржуеши мзду наемничу,
И брата твоего не любиши,
Гордыни гнев и блуд приемлеши?
Почто грехами богатееши,
Твориши прихоти диаволи,
В чесом надежду полагаеши,
Душе моя, – в богатстве, славе ли?
Сия остави беззакония,
Исторгни гнус сей в сокрушении,
И воспряни ко Всезиждителю,
Воспомянув вся согрешения.
Воспомяни, слезя, душе моя,
И Божий гнев и тьму кромешнюю,
И возопий к Творцу: Не презри мя,
Но возведи от мрака, грешную.
* * *
Яко прегрешеньми многими,
Так и язвами безмерными
Облежимь есмь, Спасе Господи,
Содержимь напастьми скверными.
Согрешаяй даже многажды
Во слезах молю просительных
Аз Твое благоутробие,
Христе Боже, Покровителю.
ВрачУ благосострадательный,
Сирых, страждущих Призрение,
Посети мя, исцели и даждь
Средь житейских бурь спасение.
* * *
Богоблаженная Отроковице,
Пренепорочная Богоневесто,
Скверна мя суща и окаянна
От непотребных деяний безместных
И помышлений лукавых, порочных,
И от злопамятных воспоминаний,
От безсловесных страстей душетленных,
От преслушания и злодеяний.
Ты же от скверны плоти и духа
Даром очисти своей благодати
Мя, окаяннаго, в струпах греховных,
Чистая Дево, Нескверная Мати.
* * *
Дарований великих и благостных
Ты сподобилася еси, Кроткая,
Богородице Дево Пречистая,
Среди твари всея, яко плотию
От Святыя Пресущныя Троицы
Родила еси миру Единаго
Жизнодавца Христа – во спасение
Наших душ от врага супротивнаго.
* * *
Надежде ненадеемых
И Помоще не чающих,
И в бедах заступление
На Тя всех уповающих,
Святая Богородице,
Нам испроси прощения
И помощь Твою скорую
Всем низпосли в смущении.
* * *
Твоего судища страшнаго,
Неумытнаго и грознаго,
Христе Боже Вседержителю,
Во уме прием и день, и час.
И трепещу, яко тать в нощи,
Искони студа деяния
И дела имеяй лютая,
Яже аз содеях истово.
Темже страхом Ти припадаю,
Многогрешный и неправедный,
Вопия Тебе болезненно:
Многомилостиве Господи,
Умолением Тя рождшия
Не отрини мене грешнаго,
Помози ми и помилуй мя,
И избави от погибели.
* * *
Страшный Твой Престол Божественный,
Житие мое лукавое:
В пору горькую, в час бедственный
Обвинят дела неправая.
Кто избавит мя тогдашния
Нужды, скорби и унылости,
Не помилуеши аще Ты,
Христе Боже, яко Милостив.
* * *
Державный покров и в скорбех упование нам,
К Тебе притекающим, Богородительнице,
Честным христианом благая Предстательнице,
Прилежно моли со безплотными лики небес,
Егоже в любви родила еси Бога Царя,
Душам немощствующим нашим избавитися
От всякаго зла и прещения бедственнаго,
Едина Всепетая Мати Владыки Христа.
* * *
Спаси, Господи, и помилуй нас,
Также нашу страну православную,
Богозданную, богохранимую,
Ея власти, державное воинство,
Да безмолвное в мире и тихое
Житие поживем добродетельно
В правоверии твердом и ревностнем,
В благочестии всяком и честности.
ПАСХА
(из Романа Сладкопевца)
Аще и во гроб глухой и темный
Подлинно снизшел еси, Безсмертне,
Но державу адову и силу
РазрушИл еси, смерть низпровергнув;
И воскресл еси от царства мертвых,
Христе Боже, яко Победитель,
Мироносицам женАм вещавый:
Радуйтеся, радость возвестите;
И Твоим апостолом преславным
ДАруяй мир, мирове – отраду
Благостную милости, и падшим
ПодаЯй востание от ада.
ДНЕСЬ
Днесь воскресл еси тридневный
Из безжизненнаго гроба
И возвел еси нас, грешных,
Врат от смертных, царства злобы.
Чудо видев, ужасеся
Ад, отныне сокрушенный,
И небесныя днесь силы
Славят Господа вселенной.
Днесь Адам ликует с Евой,
Мир державу воспевает
Власти Твоея, Всесильне…
И весна благоухает.
* * *
Молитву пролию ко Господу,
И возвещу Тому печали,
Яко исполнися душа забот
И зол, и скорбь ми сердце жалит.
И аду мой живот приближися,
И аз молюся, злом теснимый,
Иона яко в персех кИтовых:
От тли, о Боже, возведи мя.
* * *
Что не плачешися, блудная душе моя?
Ты рыдай и тем утешишися, грешная,
Смерть приидет и не сможеши ты плакати,
Очи выест безпощадно тьма кромешняя.
Вразумися ты, душе моя заблудшая,
И наряд греховный скини в покаянии,
А не скинеши – не минеши скорбь адскую,
Муку страшную и вечныя страдания.
А как в рай восходят божии страдалицы,
В золотых венцах они Творцу хвалу лиют,
Песни ангельския радостно они поют:
Аллилуия, аллилуия, аллилуия.
* * *
Совлекоша с Мене Моя ризы,
Облекоша в хламиду червлену,
И колючий венец возложиша
На главу Мою, сплетши от терний.
И в десную Мою вдаша руку
Трость худу и невзрачну внеуду,
Да немилостиво сокрушу их
Ныне, яко скудельны сосуды.
РОЖДЕСТВО
Рождество Твое,
Христе Боже наш,
Возсия свет разума
мирове,
В нем бо многим звездАм
служащии
О Едином звездою
учахуся:
Тебе истинно
поклонятися
Солнцу правды
и в Тебе вЕдети
С высоты Восход,
посетивший нас.
Слава вечная
Тебе, Господи!
* * *
Земля, подножие есть ног Твоих,
Но на главу Твою, о Боже,
Безчинно израсти же терние,
Страданий муку приумножив.
О дщери Иерусалимския,
Стезь изыдИте от неправых,
Идеже в скверне охромоша вы,
И зрите ныне Царя славы –
В венце терновом, страстотерпчестем,
Имже венча Его злодейски,
Предавый Бога на распятие,
Неблагодарный род еврейский.
* * *
Егда снизшед, слиЯ язЫки, –
ЯзЫки Вышний разделяше;
Егда же огненныя с неба
Господь язЫки раздаяше –
Призва вся в чающую радость
Соединения живаго;
И мы согласно воспеваем
И славим Духа Всесвятаго.
* * *
Мученицы Твои, Господи,
Победно венцы во страданиих
Лютых прияша нетленныя,
Спасения во упование.
Крепость Твою бо имущии
Вражду низложиша мучителей,
Демонов тщетныя дерзости
Крестом сокрушиша решительно.
* * *
Исповедуют уста мои Тя, Господи,
Тело бренное вотще уготовляется
На страдания и видимыя подвиги,
А душа гордыню тешит и не кается.
А душа же зачерствелая безмолвствует
И готовит час безумный отречения;
Сокруши сухое сердце мое, Господи,
И исторгни покаянных слез точение.
* * *
Неугасимою свещею,
Искапающи слезы теплыя
На землю пред Царем Небесным,
Гориши, Богомати светлая.
И темже даруй Твоего мне
Тепла и света несказаннаго
На дерзостное мое сердце,
Молитвенница безустанная.
* * *
Не Имам, Всевидящий Господи,
Витиийства всехвально высокаго,
Глаголов премудрых отнюд не вем,
Смущаяся слога убогаго.
Но яко от века молитвенно
И наши отцы, слезно каюся:
Помилуй мя, Боже, порочнаго,
Виждь – глас мой слезой орошается.
* * *
Стану, Господи, при брЕзе и восплачуся,
Яко ныне зрю Тя по страну иную
Бурных вод непроходимых, о своих гресЕх
И безстыдствах непрестанно помятУя.
Твои очи обрати ко мне, о Спасе мой,
И помилуй по велицей Твоей милости,
Окаянство моеЯ души в любве омый
И очисти от тщеславия и гнилости.
* * *
Не рыдай мене горестно, Мати,
Зряще мертва во сумрачнем гробе,
Безсеменно безгрешнаго Сына
ЗачалА же есИ во утробе:
Ибо чуждь злыя смерти возстану
И прославлюся, яко Бог Сущий,
И во славе Своей вознесу их –
Тя любовию, верою чтущих.
* * *
В страсе повинутися
подобаше Богу,
А не иудеом,
судиЕ безумный,
И не осуждати, вед
на злу смерть Владыку,
Судию живых всех
обвиняя втуне.
Грешному мене страстем
Скверным и порочным
Скоро повинувшася,
яко же Иуда,
Свыше к покаянию,
Господи, настави,
Да не в смерть на муки
осужден аз буду.
* * *
Вем, пребеззаконный, кто виновен
Страсти Твоея на Голгофе:
Господи, греси мои, пропнув Тя,
На кресте позорном распрострохом.
Аз невоздержанием распях Тя,
Содержимь страстьми злыми выну,
Но сего греха мне не постави,
Кающемуся,
И не отрини.
* * *
Житейская в мире сем сладость
Печали бывает причастна,
В величии не стоит слава,
Богатство над тленом не властно.
И лЕпота нежномладая,
И здравие вслед увядают,
Отъемлются смертию друзи
И искреннии умирают.
Скорбь дний услади убо нашу –
Ко Богу в любви вопиющим, –
Благих нам Виновная присно,
Нетленную радость дающи.
* * *
НиедИнаго спечалующаго,
Обретох, ни утешающаго
В моей скорби безысходной и беде,
О Споручнице всех кающихся.
И бо друзи вси в юдоли немощней
Мя оставиша и знаемии,
Но, Надежде моя милостивая,
Не остави мя в отчаянии.
* * *
Разбойника благоразумнаго
Во часЕ единем рАеви,
Возстав, сподобил еси, Господи,
Яко праведником равнаго.
И миру мя распни, безумнаго,
С душетленными соблазнами,
И древом крестным просвети мене,
И спаси от тьмы ужасныя.
* * *
Спасе, вижду украшенный
Твой Чертог, взяв хламиду,
И не Имам одежд святых
Да достойно в онь внИду:
Просвети одеяние
МоеЯ души ныне,
Светодавче Всеправедный,
Да не буду отринут.
* * *
Егда Сына узрЕла есИ Ты,
ИзменИся лицЕ Твое, Дево,
Яко хуждше злодея ведома
На распятие от иудеев.
Тихо рЕкла еси, воздыхая:
Многоскорбное – в муках безмерных –
Твое долготерпение, Боже,
Яже от иудеев зловерных.
* * *
Боже, праведнаго Лазаря
Воскресил есИ из мертвых
И мене из бездн грехов моих
Воскреси, Премилосердый.
Яко умершему Лазарю
Повелел еси чудесно
Выийти из пещеры мрачныя,
К славе Божией воскреснув,
Тако и мене, заблудшаго,
Изведи из царства мрака,
Да в душе моей свет истины
Дивно воссияет паки.
* * *
Ты тАко рекл еси, Господи:
Аз же дам вам, что просите,
Но вы враги ваша любите,
Кленущия вас – благословите,
Молитеся за вас ненавидящих,
За творящих напасть и обидящих,
Яко да будете сЫнове Отца вашего,
Иже есть на Небесех, вас создавшаго…
Боже Праведный и мой Спасителю,
Помози возлюбити ближних и на мя борителей,
И мир Твой и вся, яже в нем учрежденная,
Яко премудрость – рук Твоих творения;
И воспети из глубины души моеЯ
Песнь нОву славы:
Аллилуиа.
* * *
На страсти изшЕл есИ вольныя
В венце, Иисусе, тернОвнем,
Нося крест, на немже имел еси
На месте распят быти Лобнем.
Да якоже Авель от Каина
ПострАждеши от иудеев,
ИзЫди и ныне, от грех менЕ
Взыщи, о заблудших радея.
* * *
Уха усеченнаго коснувся,
Изцели раба архиереова
Сын Твой, Врач телес и душ недужных,
Вышним благосердием призрев его.
Вся моя телесныя болезни,
Вкупе и страдания душевная,
Изцели, Предстательнице Дево,
Рождшая Врача нам совершеннаго.
* * *
Отягчени быша сном Апостоли
В час, егда отшел еси молитися
Ко Отцу о чаше от их очию
В Гефсиманстем саде: той днесь питися.
Ныне мя унылаго, лениваго
На Твое воздвигни поклонение,
Приими, Премилостивый Господи,
Малое в нощи мое моление.