Дагьрилизир ухуси
Нурла шала сар аба,
Аба шулгIир лерсилис
Алжана саби дунъя.
Сабур, ях1 чердик1ибси,
Кьац1-шин бизиси аба,
Х1у рузули калунси
Чебиулрив ургуба?
Аршила мерлар арц1и
Чедиулрив духъули,
Урк1базир диги, карц1и
Чедиулрив делгъули?
Бирули ах1ен кьалли
Цали итиллис г1ях1деш,
Чедиулрив делгъули
Умути сахаватдеш?
Чинара итх1елаван
Адамдешла макьамти,
Х1ялалдеш, ях1, гъабзадеш
Черях1дарес дуч1ути?
Х1ергъулира агара
Разидешла хабурти,
Дегъуб бахълис дигути
Хъубзурала байрумти.
Х1ябилра кьакьали леб
Урк1ец1или биц1ибти,
Гьар ганзлис чебиулра
Дец1-шишимта берц1ибти.
Аба, х1елагъуна ях1
Леб къябала лусейзиб,
Сепайда, ил биахъес
Дунъяла гьар инсайзиб.
Аба, урх1лис мадак1аб
Х1едван къиянти бурх1ни,
К1или баркьибти к1или
Абикьаб чула дурх1ни.
Нуша- урегал дурх1я
Адикьес кац1иб гунзри
Алжанала анхълизир
Аба, кац1аби х1уни.
Бахъал леб гьанна абни
Х1яя х1яридихьибти,
Г1укъа- къусла т1акьнази
Баркьибти лайбик1ути.
Х1ябра дахъдаили лер
Халати бунагьуни,
Ил багьандан диэсгу
Ишдицад балагьуни?!
Халкь х1ербирулра или
Бик1улихьалли пачни,
Чула ахъти тухрачиб
Илдира саби пучли,
Гьар барх1и Берх1или нур
Ванзаличи дургьалра,
Ишх1елла гъаргъси инса
Рух1лизир нур агара.
Леб абни чула дурх1на
Г1ямру ц1удардарибти,
Х1ебусули бисули
Х1улбала шин керхурти.
Х1ечи гьаввак1ибх1ели
Раргадли х1у рях1ятли,
Урк1и бирар бирц1ули
Аба, халал сях1батли.
Дусмала хъярхъси "дяг1ли"
Аба, нура архулра,
Дахъ-дахъал хат1абачил
Х1ела амру бихулра.
Г1ярафа дубурличиб
Бикиб наб балга барес,
Аллагьла нурла шала
Х1едра тиладибарес.