Папа хьрак фу чразмач,
Йифериз гьич гам хразмач,
Кьеб эч1ягъиз свас аквазмач,
Дегиш хьанва дуьнья михьиз
Гьич регъуьвал амач чиниз.
Ришветрихъни авач кьадар,
Пул гвачирдаз дуьнья я дар,
Фасикьрини ийиз кп1ар,
Дегиш хьанва дуьнья михьиз
Гьич регъуьвал амач чиниз.
Катзава эл к1валахдикай,
Дуст кьунава дамахдикай,
"Фекьи" хьанва алчахдикай,
Дегиш хьанва дуьнья михьиз,
Гьич регъуьвал амач чиниз.
Лап "акьуллу" хьанва жегьил,
Кьац1ай кардик кутазмач гъил.
Мехъерини авач тум-кьил,
Дегиш хьанва дуьнья михьиз,
Гьич регъуьвал амач чиниз.
Чи жегьилар гьатнава хъваз,
Дустар галаз йифди ч1угваз,
Дидедин гьал ава ц1раз,
Дегиш хьанва дуьнья михьиз,
Гьич регъуьвал амач чиниз.
Кьей, Владик, санал акъваз,
Ша, жемир вун икьван рахаз.
Вуч хьанват1а чизвачни ваз?
Дегиш хьанва дуьнья михьиз,
Гьич регъуьвал амач чиниз.
Владик Батманов