АхIер юлдашуни,
БелчIес дигулра,
ХIушаб хасбарибси,
Дила далайра.
Дурхъал Аллагьлизи,
Ну улгулира…
«МабакIаб наб дунъя,
ХIуша агарси».
Къияндикалли наб,
Мякьлаб саб дила,
Мурад таманбираб,
Чула уркIила.
Наб берхIила нурван,
ШаладикIанти,
ХIушаб сари балгни,
Нуни дучIути.
Умсули ахIенра,
ДалайикIесра.
Дила ахIерти жан
Юлдашунасра.
ХIуша агарли наб,
ТалихI агара…
ХIуша лерхIелигу
УркIи шадсира!
ДулекIла узбиван,
ХIуша дурхъати,
УркIилизибси дард
Дила иргъанти.
Аллагь, баркалла хIед,
Барес дигулра.
Пешкешбарнилис наб,
Юлдашунира.