СТIАЛ СУЬЛЕЙМАНАЗ
Диде-буба аваз-етим,
Диде-бубад ганач ваз чим,
ЯтIани гьакI, кас хьиз,итим,
Уьмуьрда вун хьана, шаир.
ХьаначтIани ваз са савад,
Аллагьди ваз ганвай кьуват,
Шииратдин багъда са-сад
На гевгьерар цана, шаир.
Ви вилериз акур гьар гьал,
РикIе цаз хьиз гьар акIай тIал,
Зерре-зерре, стIал-стIал
Ви шиирриз къвана, шаир.
Гьар са дуьшуьш акур какур,
Авунач на кьасар такур.
Хъуьрез-хъуьрез вижеваз кIур
ЧIур крариз гана, шаир.
Физва девир акваз-такваз,
Авазва вун къени рахаз,
Ви кьакьан тIвар дамах тир чаз,
Туна фенва вуна, шаир.
23.04.2014