ГIямал балхIабикиле,
ДикIбикиб неш ва дудеш.
ДурхIя бекIудившиле,
Батун итис пашмандеш.
Дудешли раргиб цархIил,
ДурхIя вегIел хъумартун.
Нешра цайле калъунил,
Арасес ца хьулухъун.
Аррукьес разирикиб,
ДурхIя кьабулварале…
ИтI дудешла мер буциб,
ДурхIя кьабулвариле.
Кам-гьамле заман башиб,
Ития дурхIя акIун…
"Нешла" дурхIя буршавкIиб,
Угайдеш дакIудухъун.
ДурхIя хуги игъуле,
ХIисаб биран угьуб зат.
Гьаман их дикIирхъуле,
Кедирхъун я хункI, я хъат.
Их эсли угьубхIале,
Дурайкиб вархьил дудеш…
Кейъэс дигахъис иле
Барале ихтиярдеш…
Гиле ихтияр ихис,
ДурхIялизе их кехъиб.
Арукье хъябруцIикис,
ХIа вархьил дудеш цай, иб!
ДурхIяла тус дарсдугьуб,
ДурхIялзе руржла берхун.
Cуъ угьуб, хIинтIаг угьуб,
УртIукьайзе их калъун.
Дудешли их цунечу,
Камил замайс арукиб.
ХIябра миръите гъайчу,
Варгил дурхIя иргIяхъиб:
"ХIаке умцIуле урши,
Дахъол дусме агъира…
Жирдарира азир ши,
ГIядабле хIу варгира"…
Угай дудешли гьанна,
Дати нуша, вашен иб,
ЦIудара душмангъуна,
Дия хIулбас цайри иб.
ДикIхIяхъесена нешли,
Хугил хIяракат бариб.
Амма угай дудешли,
ХIура рарх рашен рариб…
Рарх аррукьес хIарурун,
Их хIинтера дурхIне леб…
ДурхIнас мякьизе калъун,
Вашен дудешичу иб.
БекIудийкиле урши,
Дудешичу арякьун…
Итала угай нешли,
Хъайзе эрхосра хIатун.
ГIямрулике их варгил,
Саяхъ хо ана калъун…
Гъай неш ва дудеш ибил,
Жан дурхIяли хъумартун.
Гашилизе икиле,
Аллагьике вяхIикиб,
Аллагь, ну варсариле,
ХIатI мякьизе гата иб.
Исуй кьутIкьуй нургъбани,
ХIулбе сухъурдугьахъиб.
Тиладила дугьбани,
Лебил мухIли бергъохъиб.
Кедаиб инжитидеш,
Гаши, дягI-гонадешла.
Аржесана пашмандеш
Арякьун хIябра мякьла.
ЦIелдалике пIай икиб,
ХIу дия дудеш иле…
ХIябла гIянжа пIайдариб,
ХIуша-нешгъуна иле.
ЦIелда хъябруцIбуциле,
Жагьил гIямрула хIал гиб.
ГIянжа ахъу душиле,
Нешли ана кIапIвариб.
Нешли гона хIарибил,
ХIябли гона варесбес.
Дудешли уркIи бургIибил,
ЦIелдали хIабургIесбес.
ЦIелда дудеш цаб гьанна,
ГIянжа дехIте - цари неш.
Нешли дудешли ана,
КехIабахъес пашмандеш.