Азиз дагълар, квез акуна азабар
Дявед сара чи Дидейри эх авур.
Азиз дагълар, квез акуна аялар
Вичин хайи бубадин пак чин такур.
Квез килигиз низ чид шумуд етимди
Тlуб накъварин селер гъана вилерай?
Куьн рикlеваз шумудни са итимди
Женгера гьич тур вегьенач гъилерай.
Азиз дагълар, дяведиз куьн паталди
Агъзуралди фена жегьил лезгияр.
Чи уьлкве гьич кьун тавурай завалди !
Дустуниз ягъ тавуй дустун ивияр.
Азиз дагълар, хва фидай югъ дяведиз
Мад садрани чи дидериз такурай!
Дяве кlани инсандин рикl, Я АЛЛАГЬ
Лап Дидедин ратунамаз пад хьурай.
Гьар сефер куь такабур кьил акурла
Аял вахтар хкведа хьи рикlел зи !
Лугьузва за даим дуа авурла:
Етим аял заз такурай чилел зи !