Дерт-гъам завай къакъатда зи,
Пагь, рик1из чим акъатда зи,
Жув рик1елай алатда зи,
Вуна темен гайи чlавуз.
Йикъар жеда йиферикай,
Рагъ хкатда циферикай
Цуьк кутун ви киферикай,
За ваз темен гайи чlавуз.
Акъваз жедач завай санал
Физ акъвазда инал-анал.
Мез рахада ширин чlалал
За ваз темен гайи чlавуз.
Заз гьамиша акваз хьуй вун!
Хурам пердихъ дуст жеда зун
ВАЛЛАГЬ, михьиз суст жеда зун,
За ваз темен гайи чlавуз.
Зи зарулвал бамиш жеда,
Чанда къуват ахмиш жеда,
Зи чинин ранг дегиш жеда,
За ваз темен гайи чlавуз.
Вавай яргъаз къакъатдач зун,
Ваз килигиз галатдач зун,
Бедендай зи фида зурзун
За ваз темен гайи чlавуз.
Хъуьтlуьн цикlиз рахад билбил.
Шад ийида чи кьвед гуьгьуьл,
Буш жеда,ви гъил кьур зи гъил,
За ваз темен гайи чlавуз.