(Сажидин муаллимдин "Темпелдин хиялар" шиир к1елайла)
Чим акъатиз тlанурдин фу,
Суфрадин юкь-юкьвал ала.
Жанг янавай кьве рычал-су
Генани заз мукьвал ала.
Са чарх ниси,кварцин гъери,
Пешин дулма таза кlелен.
Каф винеллай некни фири
Луьле кабаб тунва кьеле.
Кьве синида хали гатун,
АцIай вар хьиз хъуьрез ава.
АцIурна цIиб медни тутун
Шумуд жуьре шуьре ала.
Зи кlарабра гьатна хьи каш.
Пешин дулма агудна за.
Къара алай дуьгуьдин аш
Са къапуниз акъудна за.
Кьарай къвезвач рикlиз зерре,
Бул няметар вилиз акваз.
Кьуна гъиле ргай фере,
Хьана зи руьгь цава рахаз.
Суфра акваз авагъна зун,
Эгечlдамаз са вишер хъваз,
Нагъв вилеллаз къарагъна зун
Ахвар хьана акурди заз.