ГIямал балхIебикили,
ДекIарбикиб неш - дудеш,
ДурхIя кахиахъубли,
Батур илис пашмандеш.
Дудешли раргиб цархIил,
ДурхIя бекIлил хъумартур,
Нешра цунни калунил,
Аррукес ца вализур.
Разирикиб аррукьес,
ДурхIя кьабулваралли.
Ит дудешла мер буцес,
Уршис рахли виалли.
Цакамси манзил дикиб,
Илдала дурхIя акIуб,
«Нешла дурхIя» лайвакIиб,
Убайдеш дакIудиуб.
ДурхIя халакайъулри
Чедиулри гьар секIал…
Ил даим дикIвирулри,
Убай дудешли абдал.
Сай халаваибхIели,
Дурайкиб вархьил дудеш.
Чеэс диги аурли,
Барали ихтиярдеш.
Ихтияр бариб илис,
Уршира чеваахъиб.
- «Арукьен хъябруцикес,
ХIела дудеш сайну» - иб.
ДурхIяла ранг дарсдиуб,
Руржери чедибухъун,
ЦIубиуб, хIунтIениуб,
УркIкавхъи урши калун.
Дудешли ил сунечи,
ИтхIели шадив укиб.
Дахъ мурити дугьбачил,
ДурхIя виргIявитергиб:
«ХIегIив умцIули, урши,
Дахъал дусми деркIира.
КъяйцIдарили азир ши,
Къияйчил вакIибсира».
Убай дудешли гьанна,
Арукьен ишавад иб,
ЦIудара душмангъуна,
Сайри дила хIулбас иб.
Урши вархьхIаэс нешли,
Халал хIяракат бариб,
Амма убай дудешли,
ХIура рарх аррукьен иб.
Рарх аррукьес хIериуб,
ЦархIилтира леб дурхIни…
Ил мурхьли пикрирухъун,
«Вашен хIу дудешличи».
Дудешличи арякьун,
Урши бекI гIяшбуцили.
Хъули ацIахъес хIетур
Итала убай нешли.
ГIямруличив ил камти,
БецIван цунухъи калун…
Дугьби «неш», «дудеш» ибти,
Жан дурхIяли хъумартур.
Гашилизи икили,
Дугьайзур Аллагьличи:
«Аллагь, ну арукили,
Хьуравараба хIечи».
Кьудкьул нургъба картIибти,
ХIулби сукъурдиахъуб
Тиладила дугьбани,
Лебил мухIли беръахъуб.
Чедаиб къиян гIямру:
Гаши, дягI ва буцIардеш…
Ил хIябрачи арякьун
Чердикахъес пашмандеш…
ЦIелдаличи байикиб,
ХIу дила дудеш или…
ХIябла гIянжи байдариб,
ХIуша нешгъунти или.
ЦIелда хъябруцбуцили,
Жагь гIямрула хIял битIун,
ГIянжили кIапIуцили,
Иш пана дунъя батур…
Нешли ванахIерибил,
ХIяблилра ванавиру,
Дудешли лайвакIибил,
ЦIелдали кьабулвиру.
ЦIелда дудеш саб гьанна,
ГIянжа биалли – сар неш…
ХIябли бегIтани кьяйда,
ХIеху уршис пашмандеш.
(Шур. Аминат Ахмедова)