Кисне арцли дицIиле,
ХIу пухIукIуй замайзе...
Гъурдашунтли уциле,
Жириру хIу гьавалзе...
Савгъатулачу вашуд,
Гьаман гъурдашла хъайзе...
ХIу цIакьле гIядабулхъуд
Икале итI зарайзе...
ХIа арц дегъубил гъяйзе,
Гьади левкьяд хIу, муна...
ЦайхIале хIу зарайзе,
Агора ца "хIугъуна"...
Кеблумбазе цайхIале,
Агора хIа ца гъурдаш...
ХIа арц губагорхIале,
ГIягIнил хIинри, тIакьа баш...
Кабииле хIачу барх,
Лебил хIяхIябукIуте...
Ишбари бихIу жан чарх
Диру хIу хIалулате...
Иш гьинела замайзе,
Арцла цаби гъурдашунт...
Ициле хIу урхIизе
Бурар итис дяхIлакунт...
-Адамике мармавру,
Гъурдашдеш мадурцида...
УргIул хIу мяшт ирхIайру,
Варе хIу ирхмархуда...
Азилзакан ца гъурдаш
Марил дурайкесбес хIа...
ХIавгьесана тIакьа баш
Дузяхъен бекIла мехIа.