Густа сцелюцца туманы
Раніцою ля ракі.
Праняслася ў вёсцы чутка,
Што "пайшлі" баравікі.
Не даспаўшы, не паеўшы,
Без увагі на гады
Рвуцца з вёскі за грыбамі
І стары, і малады.
Па дарогах і па сцежках,
А падчас і наўпрасткі
Праз пасевы, праз пасадкі
Ў лес нясуцца грыбнікі
На машынах, матацыклах,
Раварамі і пяшком,
Хто з карзінай, хто з вядзёркам,
Хто з кашом, хто з рукзаком.
І забыты ўсе праблемы.
Нават болі не баляць.
І ва ўсіх адно жаданне-
Больш баравікоў сабраць.
Разбудзілі лес дрымучы
Пераклічкай грыбнікі.
Пачалося паляванне
На грыбы- баравікі.