Даргала ца шилизе,
Бугьубил хабар бурис…
Дикалра дисализе,
ХIушаке гIяйп хIабирис.
Цабри энила заман
Миъэ лерри гьар мелла,
ЦIубле цабри гьар майдан,
Бурес хIаврун итI дягIла.
Дусме царри гашила,
Халкь гашили бубкIулри…
Аргъ цабри суремала,
Бузес халкь хIабурулри.
Шила ца дубизела,
Хъайзе пякьирте лебри…
Арц баргес цархIил мела,
Хъа вегI дураухъуври.
КIуялра дус дикиле,
Хъа вегIла хабар агуб…
ЭбкIиле варгес иле,
Шилзе хабар гIяйбугьуб.
Амма гьачам ца кагъат,
БакIиб хъалибаргике…
«ХIабугьуле нам ца зат –
Дураркус ца унгъике»…
ЦIяба-цIяба диривтли,
Ши бамкьахъува буиб,
КIапIдариле дяхIили,
Хъулре дяргIиле дуиб.
Дуравхъунил хъа вегIла,
ХIябалра дурхIя лебри…
Мякьизе цабри нешла,
Гашилизе бикилри…
Гашили хIабебкIахъес,
ДекIил хIянкбе дируле…
ДурхIназе кьацI беркохъес,
Цари пикри рукIуле.
ЦIакьле зягIиприкиле,
Карихьуври дурхIна неш…
Царри цIакьле чIукьале,
Ихис леби сабабдеш…
ХIябал бари аризес,
ХIаруруле лерри неш…
Гашили бебкIхIабебкIес,
Дуциб садакьачидеш.
Садакьалис дяргъибил,
Ца-хIябал картошкара…
Ихти цабри дерцIибил,
Язихъил дурхIнанира.
Дайдуги бакIибхIале,
Кабихьун нешла мякьла…
Излумани руциле,
Неш ругьхIаругьуб гьантIла…
Савладуги тIатIариб,
Хугил урши цуния…
Урши, бягъиб заман, иб,
Батесра нам дуния…
Узи-рузи жеголе
БихIен, тилади цаб иб.
ВакIесбес кьанхIавгьуле,
ХIушия дудешра иб.
- Неш, неш дия ахIарил,
Нуша цес далтада иб,
ХIулба нургъбе дашибил,
Гьеч замайс кьа хIадииб…
Нешике хъябруцIикиб,
Иб, ятимте мадири,
ПIай укIуле вехIихьиб,
Амма нешли хIал гилри…
Таманругьни аргъиле,
Нешла чарх батурагъиб…
Мелзе икес хIавруле,
УртIукьайзе цай икиб.
Ца мелзе вякьизува,
Къархъа ана цай вяргIиб,
Нургъбе кIачIхIадизува,
Михъилзакан дяхI дашиб.
УркIхIабухъяхъесана,
Узира ва рузира,
Кьас бариб кайхьесана,
КIапIкапIгьуле ихра…
Камил заман бикиле,
Рузи варгил тIатIругьуб…
Неш, хIу рууд ряргIиле,
Барх кIуялра кIапIугьуб…
Камил гонаругьуле,
РузирегIел аризун,
Хугил узи, тIатIугье
Иле, их дугьарризун.
Амма хугил узили,
Гьеч жаваб чархIабариб,
ХIулбле дицIибил нергъли,
КехIадахъес кьас бариб…
Узира лапI варгина,
ДягIяни цай эрхиле,
Мякьизе кайхьун нешла,
Гонавара ну иле…
БяргIибил нешла чархли,
Гьеч гонадеш гибхIагиб…
Шуял дусла уршли,
Цес гонахIайрида иб?
Рурси шак-шак рикиле,
Нешла дяхIике тIариб…
ХIулбе цари, неш, гьаргле,
Малера русулрив иб?
Неш, неш, неш, неш, неш иле,
ТIама дариб рурсили…
УртIукьайни руциле,
Диса дариб рурсили…
ГIа рукIуле узилзе,
Айзе иле гъайрухъун…
ИтIува ахърилизе,
Узила чарх бушбухъун.
Айзахъес хIаругьуле,
Рурси дура гьарракIиб…
Аркьуй хьунул рашуле,
ДяхIилзакан кераиб…
Аррякьува мякьизе,
Нушачу рашигъа иб…
Амма аркьуй хьунуйни,
Рурси хIисаб хIарариб…
Дарестера дергъуле,
Рурси хъули чаррухъун…
Дард аргъесил аголе,
Нешла мякьла карихьун.
Узи вегIел варгина
Нешли гона хIариле…
ВакIиб рузила мякьла,
Гона вара ну иле.
Аргъ берхIихъуле буиб,
Агуб ца урхуй хъайзе…
БерхIахъ унза кьутIбариб,
«Леву адам юртизе»?
СинкьбукIуй дурхIна тIамре,
Дякьиби итI ахIяйни…
Це бугьуле иб, дурхIне?
Дуцирия це хIяйни?
Багьаннала аргъиле,
Ухъна адам уркIухъун…
ДурхIна ятимдешике,
ЦIакьле цай язихъухъун.
Дуравхъува халкь бяргъиб,
Жаназа аркахIа иб…
БяргIибил гонзализе,
Нешла чарх кIапIбариб…
Сабурдешра буциле,
ДурхIне эсизе бакIиб…
Садакьа бяргъес иле,
Узи-рузи батбихьиб.
Пякьир ятимте иле,
Халкьли камил затра гиб…
Хъули чарбулхъухIале,
Гьахъкан урчи кебаиб…
Урчилике кайъиле,
Гьалант шайзе дуциле…
Ца муръул адам леври,
Их шилизе урхуле…
Рузили иб узилзе,
Садакьа хIагесу иб?
Гьалант леричи шайзе,
ДуахIа вакIайкем иб…
Вягъиб адам мякьизе,
Уршили някь кебуциб…
ТIарибхIале хIулбазе,
УртIукьайни их уциб…
Дудеш-де-ш… иб рурсили,
Дудешли багьун дурхIне…
Урши уциб кьакьали…
Бисали дицIиб хIулбе.
Цен дуирия иле,
Хьарбягъиби дудешли…
Цебирулера иле,
ХIушия гIязиз нешли…?
Урши кьакьавакIиле,
Синкьизе цай икиле…
Лимзи жирхIабулхъуле,
Неш ребкIилрар эс иле.
Рурсили дудешизе,
Даг тяйдирикиб иб неш…
БакIиб гьанна нушаке,
ЦIябил хугил марайдеш.
ХIулбе шершер дугьуле,
Дудешла нургъбе дакIиб…
ЦIакьле цай кьунтIукIуле,
АхIле зат гьади дакIиб…
- Гьанна ахIарил дурхIне,
ХIабиргъяхъис садакьа…
Дия варгил жанане,
МадукIудая кьакьа.
Ца талихIла жан анко,
ХIяре арбякьун, цIахдеш…
ЦархIил талихIла анко,
Дурабикиб, цай дудеш.
Эххъуна гIязиз хабар,
Бугьубил цаби букIар…
Чуйна белчIунхIалера,
Нургъбе бяхIла кIардукIар.