К1анда заз зул

         
               
КIанда заз зул,йисан вири вахтаркай.
Савух жедай заз зи багъни, кIвални, къул,
ХьаначиртIа зи уьмуьрда вунни зул.
За лугьудай магьрум хьана бахтаркай.

КIанда заз зул - тIебиатдин гам кIанда.
Къе атана акъвазнавай парудал,
  Къацу перем дегишнавай цIарудал.
 Ви келегъа алайвиляй,гьам кIанда.
 
КIанда заз гьакI вичин гьунар къалузвай,
Зулун гарни,хесетар квай эркекдин.
 Акъвазнавай тараризни керчекдиз:
"Тан кьецIилдай вахт атанва,"лугьузвай.

КIанда къайи марфни, къирме стIалар.
 Куьмек авур чи къуьн куьнуьхъ галкIуриз,
Мажбурай вун хъвехъ зи хъуьхъвел алкIуриз.
Шегьре авур муьгьуьбатдиз хъутIалар.

Чи уьмуьрда гел тур,кьацI тур мишер хьиз
 Зулун йифни, вакай зи яр хьайи вахт.
Вун ичин тар, зун женжел гар хьайи вахт -
Ви парталар са-сад вегьей пешер хьиз.