Лагь вуч фад вун физва уьмуьр?
Кам явашра тади мийир.
Тарама зи уьмуьрдин гам,
Юкьни хьанвач, хьанвач тамам.
Жагъун тавур рангар ама,
Кьаз тахьанвай кваквар ама.
Гьиниз я вун югъур хьана?
Кьилел къачур гьайгъур хьана?
Сабурлу хьухь мийир къелет.
Заз кlвалахдай вице муьгьлет.
Куьтягь тахьай крар ама,
За ял тавур парар ама.
Теклифарин пара яз сан,
Алцумна за писни хъсан.
Гьар чкадиз гайи эвер,
Физ кутунач кlвачерик звер.
Ахъай тавур варар ама,
Хкаж тахьай гурар ама.
Алачтlани акьван яргъал,
Цlару дагъдин тlуьнвач маргъал.
Гатун кукlуш, Шагь дагъ, Шалбуз
Къвазнава зун къведа лугьуз.
Салам дагай сувар ама,
Пеле такьур шагьвар ама.
Булутар хьиз цавун юкьвал
Къукърумариз мукьвал-мукьвал,
Зи фикирар кlватl жез,чикlиз,
Агакьнавач вири кхьиз.
Кхьин тавур цlарар ама,
Чlулав тавур чарар ама.
Жегьилзамач сейке яшар ..
Ятlани чун хьайла къаншар,
Рикlевайди лугьуз тежез,
Вилералди сада-сад нез,
Рахун тавур са яр ама,
Муьгьуьбатдин цlаяр ама.
Худадини санал вири
Шад ийидач куьлуь- ири.
Къе тавуртlа,белки,пака
Хкяда зун алай чка.
Зи умуддин маяр ама,
Агакь тавур паяр.