За кьакьанриз килигдамаз, Шагьсув хьтин хад аквазва,
"Лезгинкадал" илигдамаз лезгивилин дад аквазва.
Хиял физва беден туна, гагь арандиз, гагь кьакьандиз,
Хайи чилин цуьквер рик1из вилерилай фад аквазва.
Вуч верци тир гъвеч1и ч1авуз акур ахвар пак лайладив ,
Алатайт1ан азим йисар, заз а ахвар мад аквазва.
Кьулан вац1ун рагъул ятар Каспи гьуьлуь элцифарда,
К1еледани Куьредани заз зи рик1ин пад аквазва.
Жегьил руша къуьнел алай кварцей са хуп1 яд гайила,
Хъут1уьн юкъуз зи вилериз булахд кьилел гад аквазва.
Лугьумир на гьич иер туш Гьиндустанни Арабистан,
Шагьмарданаз хайи диге гуьрчегвилиз сад аквазва.