Акlуб дунъя датурли,
Урхlлис шадив вакlилра.
Сен вакlибсирив алли,
Жаваблис агу селра.
Гьанбиркур гьаланачи,
Жавабти дахъал сарри.
Гьарил секlал далулри,
Далутиван дилзулри.
Гьарахъла дамла тlама
Саркъли ургъу бикаргу.
Гlур, чедикlрелла хlули
Сукъур бирар бикlаргу.
Агь жагьдешла гьалакдеш,
Иш пикрумала чесдеш.
Хlедалути гlямрула,
Дагьурхlели къияндеш.
Ну акlуб дила дунъя,
Агь ил хlела жагадеш.
Гьарил хlела гlядатла,
Дила уркlилис гъамдеш.
Марли ургхlергуд цалра,
Цалра адам дунъяла,
Вегlла дунъя датурли
Урхlлайиб дунъяличи
Талихl бургисну или
Гьарахълавад вакlибси,
Иш дилаван пикруми,
Пикрумази агарси.