Гатфарин вахтар ,къацу хьанвай чил
Акур рушарин,шад жеда гуьгьуьл.
Дестеяр хьана,к1ват1 жеда санал
Лугьуз ,,Ша рушар,, ацукьин инал.
Килиг,къацу векь гьеле я назик
Чаз кутугнавай чка язва им.
Ийиз суьгьбетар,акъайин сирер.
Кутада чна ,рушарин са ким.
Махпурдиз ухшар векьери къацу
Чимивиляй,кьил хкажай виниз.
Яран марфари , дугурай цаву,
Гатазвай векьер ,гьич инсаф тийиз.
Я дахьайт1а къе к1ват1 жедани чун
Барсадихъ галай къайи булахдал.
Алахъдани сир чаз чира лугьуз.
Кьил хура тунвай ,ч1ехи къавахдал.
Ст1алри ,хар хьиз к1евиз акатай.
Векьин хаму тан эгеч1на гатаз.
Хабарсуз,хъел кваз гару акъатай
Рушарин хиялар акъудна яргъаз.
Фена к1ват1 хьана рушар са тарцик
Яран югъ я къе марф къвайит1ани.
Кьежидач беден ацукьин инал,
Кьуд пата къайи гар хьайит1ани.
Эгеч1на са руш эхтилат ийиз
Килиг,вахар куьн т1ебиатди гьал
Дегишарзава,гьа инсан хьиз жез,
Вучиз ят1ани акъуднава къал.
Белки адазни тапарарнат1а
Вичин к1енида лагьана сада.
Эхиз дахьайла рик1е авай т1ал
Марфад ст1алар дугурнат1а чал.
Низ чир хьурай кьван,белки ам зун хьиз
Дидеди ганай дак1андаз гъуьлуьз.
Йисни дахьанвай зин хвани гваз зун
Вилел нагъв алаз .хтанай к1вализ.
Сефилдаказ ,мад са руша муькуьбуруз килигиз
Вичин фикирни лагьана, и гьавадив гекъигиз.
Фитнейралди къакъатайбур.чипел тахсир эцигиз
Гатазват1а цфер хъиляй,лап лашунал илигиз.
Вичин сирни манийралди
Лугьуз са руш хьана вилик
Гуьгьуьл пашман вилералди
Хъвер кутаз к1анз канвай рик1ик.
Заз вун к1ан я масад к1андач
Лугьуз цуьквер гайи ярди.
Зун тек туна ,масад кьуна
Накь свас к1вализ гъайи ярди.
Белки им зин бахт я вахар
Я дахьайт1а бахтсузвиляй.
Санал жедай хьанач вахтар
Фад акъатнай ам зин гъиляй.
Зин фикиррин .зин хиялрин деринвал
Чир дахьурай пехилвалдай рик1ериз.
Тахсир квачир т1ебиатдин серинвал
Дарман тушни ? бес къуьл цанвай ник1ериз.
Лагьана са руша к1вачел карагъна
Алахъна ам вичин дустар хъуьруьриз.
Муьгьуьббатдин эхтилатар рушарин
Бащламишна маса патахъ элкъуьриз.
Дуьньядиз чун къведай ч1авуз
Пар к1улаваз къвезвайди я.
Вучиз ,чун и сувар юкъуз
Ик1 перишан жезвайди я?
Перпилагар кутан гила
Ша ,Яраз лугьун манияр.
Маса жуьре рахан гила
Къведайвал патав к1ени яр.
Такабурлу жемир куьн ,заз яб це рушар.
Закай свас хьуй ,са касдин,фидалди яшар.
Кич1е я заз кич1е я .амукьиз зун тек
К1анзава заз къужахда кьадай са биц1ек.
Ахпа жеда к1енивал .дидедиз гьала
Кьаз къужахда лугьудай ,зин ширин бала
К1енивилиз вафалу,ваз халис панагь
Бала я вин бала я ,уьмуьрдин даях.
Зин к1енивал гуда за ,баладиз жуван
Дережайрив агакьрай лагьана кьакьан
Жедач маса к1енивал ,дидедиз гьала
Кьаз къужахда лугьунлай,зин ширин бала.
Авай кар я ,гьакъикъат ,гьар сада вичин
Ч1ехи ийин балаяр,акваз туьмер чин.
Тван тавун, чин балайрин гъвеч1и рик1е т1ал
Дуьньяда ,идлай ч1ехи бахтар ава жал?
Акъатна югъ,чк1ана ким ,шад хиялар гваз
Давамариз яран сувар,ц1аярив къугъваз.
Бахтсузвилер ,вегьена ц1ун ялаврал чипин
Дахьурай лугьуз ,рушари,са югъни четин.