«ПЕРИЗАДА, ГЬАЙ ГУЬЗЕЛ ЯР!»
Перизада,Перизада!
Гьай, гуьзел яр!
Илифара и чи сусар!
Гьай, гуьзел яр!..
«Килигдач зун, килигдач зун…Тараллай пеш хьиз вучиз зурзазва? Секин хьухь, рикI, секин хьухь! Садлагьай сефер туш ваз и манидин ван къвез…Акъваззавач, секин жезвач рикI…Къвердавай мукьвал жезва «Перизададин» ван. Ингье, кьилел хунчаяр кьунвай рушар-сусар…
Перизада, Перизада,
Гьай, гуьзел яр!
Къавумарин къава гуьзгуь,
Гьай, гуьзел яр!
Килигдач зун, килигдач… Килиг тавуна акъваз жезвач завай…Килигда зун, килигда!.. Амма затIни аквазвач заз. Вилер кIев хьанва зи, накъвари кIевнава зи вилер. Накъвар михьдай гъил хкажна , аман кумач захъ. Кумач захъ аман, атIанва зи аман.
Агакьзава чи варарив. Анжах и «Перизада» лугьузвайбур, хунчаяр гвайбур чи варарай гьахьзавач, абур алатна физва. Абур маса кIвализ физва. Хунчаяр гваз, «Перизада» лугьуз-лугьуз. Дидедиз гьакI кан хьаналда зи канидан…
Гваз физва, гваз физва хунчаяр, налугьуди, абуру тухузвайди сусан пекер туш,акI жезва заз, гваз физвайди зи рикI я, зи кана чIух хьанвай муьгьуьббат я, кучукиз тухузвай, «Перизада» лугьуз-лугьуз.
Зани астадай лугьуз кьил кутазва,зани лугьузва «Перизада»:
Перизада, Перизада,
Гьай, гуьзел яр!..
Лугьунарзавайди хьиз акъатзава зи ван. Куьтягь хьана, вири куьтягь хьана…
Аквазмач «Перизада» лугьузвайбурни, манидин ванни амач… Къе и хуьре мехъер ава. Анжах мехъер авайдалай ясдавайдаз ухшар я заз къе и хуьр, къе и дуьня. Къенин «Перизададив» кучукнава на лагьуди зун. Мурадар, хиялар, умудар, эхиримжи умудни галаз…»
…Са руш акъвазнавай дак1ардин вилик.Вилер килигзамай рекьериз. «Перизада» лугьузвай рушар-сусар фейи рекьериз…Муьгьуьббат техквернихъ фейи рекьериз…