Зи вилик ква ви суьрет,экв аватай,
Цlару перем,хважамжамар акахьай...
Са экв я вун зи уьмуьрдиз акъатай,
Сефил жедай зун,яр,вун хьаначиртlа!
Ша чи хуьруьз,дамахдивди тамашиз,
Кьуд патавай гуьрчегвилив агатиз.
Уьмуьрдикай жедачир хьи заз чара,
Сефил жедай зун,яр,вун хьаначиртlа!
Уьмуьрдикай вучда,къачуз дад тежер?
Тlунутl хьтин варз цавай агъуз тежер?
Лифрен лувар хьиз юзуриз на гъилер...
Сефил жедай зун,яр,вун хьаначиртlа!
Жуван ягълух ви бахчада тада за,
Марвардин цуьк кьве гъиливди кьада за,
Зи жегьил рикl ви фикирда твада за...
Сефил жедай зун,яр,вун хьаначиртlа!