Расхінаюць аканіцы ў лета
Воблачкаў пунсовых астравы,
І вандруе чэрвень безбілетны
Пахам свежа-скошанай травы.
Дыхаць бы і дыхаць гэтым пахам,
Наталіцца водарам лясоў,
"А капэла" гурт натхнёных птахаў
Так спявае мноствам галасоў!
Назбіраць суніц духмяна-ласых,
Па расе прабегчы басанож,
Зноў згубіцца ў полі раннім часам,
Ці злавіць знянацку летні дождж.
Чэрвень звонкі падсілкуе цела
І напоўніць радасцю душу.
Штосьці зорка досвіткам паспела
Прашаптаць: сакрэт не раскажу...
Затрымацца хочацца ж у леце,
Каб спазніцца на асенні баль,
Бо вясёлкі цешыць яшчэ квецень
Лашчыць зрок блакіт нябесных хваль.
15.06.2013 Ядвіга Доўнар(Кур'яновіч)